نصايح لكل بنت فى اول مقابله ليها مع شاب...بعلم اهلها طبعا

دى نصايح لكل بنت هتقابل فيها شاب واكيد طبعا هيبقى بعلم الاهل وهيكون فى بيتها
عشان يتعرف عليها ويعرف اذا كان دا نصيبه ولا لا
المهم
خليكى هاديه جداا ومرتاحه وخدى حمام دافى وهدى اعصابك قبل المعاد
متقلقيش ومتبقيش متشاءمه وتفكرى فى الاسوا الى ممكن يحصل
خليكى متفاءله بان كل حاجه هتبقى كويسه وهتعدى على خير
توكلى على الله وفوضى امرك ليه وادعيه انه يوفقك بالى فيه خير ليكى

بالنسبه للميك اب متبقيش مبالغه اوى فيه خليكى طبيعيه حتى لبسك يكون معقول
وبسيط ومتكونش مطرقعه اوى عشان تبانى على طبيعتك اكتر

لو حطيتى مكياج زياده اوى عشان تدارى عيوب فيكى دا يبقى غش
بس مين فينا الى هتعمل كدا
اهو كلام وخلاص
وبعدين مش تجرى على اى حد وتقوليله على موضوع الخطوبه ولا حتى زيارته غير لما تاخدو القرار
عشان لو مفيش نصيب ميبقاش حد فيكو كرامته انجرحت قدام الناس
هم مش هيسكتو وهيبقو عايزين يعرفو ايه الى حصل ومين مش عاجب مين وكدا

وانتى داخله مترتبكيش ولا تخافى خليكى واثقه فى نفسك متغرقيش فى عرقك ياهبله
وبردو متبقيش واثقه زياده عشان يبان انك بتتكسفى ال يعنى عندك حياء وخجل

بصيله دا حقك الشرعى وانتى مش بتعملى حاجه غلط
.فى بنات تندب فى عينها رصاصه لدرجه ان هوة يتكسف من كتر بصها عليه
لا مش عاوزين كدا بصى من تحت لتحت ممكن بس المهم تشوفيه كويس

متلبسيش كعب عالى ياناصحه ممكن تقعى وتحرجى نفسك
بلاش تشيلى انتى صنيه العصير عشان ممكن تقع من ايدك كفايه عليكى الجاتوه
ادخلى قولى سلامو عليكم واقعدى فى حته تعرفى تشفيه منها خليكى ناصحه

متقعديش تضحكى وتفتكرى نفسك قاعده مع كريم ابن اختك دا غريب عنك يافالحه
وربنا يوفقكو للى فيه الخير يارب



كنا مع يوميات الهبله المخطوبه