[center]يا سلاملم يا سلام
والوطن عايز كلام
والإذاعة مستباعة
قول يا عم الشيخ إمام
***
ما حنا قلنا م البداية
وانتو عارفين الختام
حيث إن الصالة بوظه
والحضور نيام نيام
والمجال فيه ألف قاضي
كل قاضى وله مرام
والشهود نسيوا الشهادة
والقضية والكلام
والقفص لم الضحايا
والهلالى لما قام
قلعوه روب المحامي
لبسوه توب لاتهام
والنيابة ع الغلابة
طبقت بند اللجام
***
يا سلاملم يا سلام
والوطن عايش آلام
والإذاعة مستباعة
قول يا عم الشيخ إمام
***
بينما والحالة نيله
والبلد بالعه الفتيلة
والخواجة بألف حيلة
جاى يلغوص فى البرام
يحكوا عن أسطى الفلاسفة
إنه أفتي
ولا أفسي
فى القضية الهيكلية
وإن دي
ما هيش منافسة
***
وأنت مالك يا أسطى فلس
جاى تحسس أو تملس
الخواجة لما فلس
جاب دفاترينه القدام
دشدش الباترينه تبعه
شد شعره
عض صابعه
إنت إيه شأنك تتابعه
أما مخك مش تمام
شالوا هيكل
جابوا علوه
كلهم فى الهم بلوي
إنت شوف لك سهرة حلوه
بكام قزازه وجوز حمام
واحنا شايفين الخواجة
واللى جايبين الخواجة
واحنا كاشفين
كل حاجة
وانت تتنيل تنام
***
ع الهيافة فى الكلام
شوف يا عم الشيخ إمام
خلق فاضيه
وعامله قاضيه
وهى موضع لاتهام
موضوع: ع اللي حصل .. أحمد فؤاد نجم 
الخميس 5 يونيو 2008 - 6:37
